香港已經喺 2007 年 12 月 31 日夜晚 7 點鐘正式啟動數碼廣播，雖然數碼廣播講就講咗好耐，但一到塵埃落定時，有疑問者依然甚眾；唔少人其實一知半解，甚至連報紙雜誌記者，寫數碼廣播、講高清電視，都寫到亂晒大籠。電訊管理局雖然有唔少文件，但大多比較技術性，數碼廣播網站資料相對亦太少。
以下資訊希望可以畀對睇數碼電視廣播有興趣嘅人一啲有用資料，二來可以解答到一般討論區上嘅月經同日經問題，等發問者知道點可以問得更清晰，協助者亦可以專注解答更專門嘅問題。
常見問題
有報紙講過標清係 720p，高清係 1080i？
報紙港聞版記者未必識得呢啲嘢，請原諒佢地。
基本版接收器可以睇到所有標清台，升級版就睇埋高清台？
有啲雜誌係咁寫，呢個而家已經唔係事實。
就 好似你平時電腦聽歌，有 MP3, AAC 等格式，睇片有 RM, WMV, Xvid, DivX 等格式，而家電視台用緊兩種格式去傳送數碼廣播訊號，原有嘅台用 MPEG2，新嘅台就用 MPEG4 H.264。本來亞視堅持所有台用 MPEG2，如果佢堅持落去，咁的確，基本版解碼器係睇得到亞視嘅有標清頻道，甚至高清頻道，但而家亞記已經決定用埋 H264 作為新台嘅影像傳送格式。由於基本版解碼器只識睇 MPEG2，換言之，基本版只能睇到翡翠明珠本港國際四台。
數碼廣播質素一定靚過而家啲類比訊號？
而家大部份報紙雜誌，讚到數碼廣播好清好靚，其實已經有啲超現實。當然，數碼廣播可以好清好靚，但唔代表一定清同靚。你走去 youtube 睇片，都係數碼影像，睇 DVD，都係數碼影像，證明咗數碼唔一定會好好或者好差。
大 氣電波唔係俾電視台霸晒嚟用嘅，數碼廣播有一個好處，就係電視台個頻寬就係得咁多，但佢可以根據需要，減低每個台佔用頻寬，從而提供更多頻道。所以你見到 數碼廣碼亞視開台比無記多，就係咁解。但此消彼長，減頻寬，就代表同一時間可傳送資料減少，但你個畫面唔可以縮細，所以減頻寬代表要犧牲畫質。
情況就好似 MP3，你將首歌壓做 64kbps，同壓做 256kbps，前者 FILE 細啲，後者大啲；同一個 100GB HARD DISK 前者可以裝更多歌，但音質就一定係後者好。
而家免費嗰四個台據知每個台會有大槪 5Mbps 傳送，包括聲畫。但如果你本身類比訊號已經收得好好，睇返數碼廣播，可能會覺得類比反而更清，尤其是當畫面急速移動時。
所以，數碼廣播可以冇雪花鬼影係事實，但唔好將數碼廣播神化。當然，一睇高清台就實冇得比，所以亦唔好咁快就抗拒，始終而家都係屬於傳統廣播同數碼廣播嘅過渡期，ANALOG 廣播結束時，數碼廣播就可以有更大發揮空間。
當然，數碼廣播仲有一樣嘢係唔包嘅，就係電視台嘅節目質素。
數碼廣播後唔加機頂盒，冇得睇電視？
呢個係有啲收費電視人員用嚟呃阿婆嘅招數。數碼廣播開始後，類比制式會繼續現有播放模式。暫定直至 2012 年會關閉類比制式，ANALOG 廣播就會成歷史。但呢個係預計，你諗下，如果到時得一成人玩緊數碼，政府夠唔夠膽話閂就閂？而且佢一閂，政府係有責任用直接方法協助市民過渡，甚至要送解 碼器畀未有能力購置嘅人，所以 2012 年都係聽住先。
我唔想睇高清，可唔可以用原本部電視睇新台？
如果係講緊用返原本類比制式接收新台，答案係唔得，因為新台只會用數碼方式發送，唔會再用傳統嘅類比制式。
標清台係咪 16:9？ 720x576 點出 16:9？
解像度與顯示比例
即使現有頻道將來嘅數碼標清台將來都會用 16:9 做廣播，已經係事實。有人認為，標清係 720x576 (PAL)，做唔到 16:9，但其實事實並非如此。 大家都知道像素係乜嘢，試樣像一個以 5x5 像素構成嘅畫面：
如果我而家需要一個畫面，係上面呢幅圖嘅兩倍闊度，而高度不變。其實呢種情況係有兩種解決方法：
方法1：像度尺寸不變，每一行加多 5 個 pixel
方法2：pixel 總數不變，但每個 pixel 嘅闊度，係原本嘅兩倍
而 以標清 (720x576) 去輸出 16:9 比例，其實就係用第二種方法：解像度固定，將每一個 pixel 代表嘅空間加闊。4:3 喺拍攝上，同一個 pixel 單位，16:9 會表達比 4:3 解析度表示更多嘅視訊資料。實際上單喺橫向睇，如果以前一個 pixel 所表達到嘅空間係 1 unit，喺 16:9 下就會變成 1.33333333... 個 unit。
即係話，一個「PIXEL嘅比例」，同佢「影像輸出比例」，係冇直接嘅關係。
一個 PIXEL 佢自身嘅比例，就叫做 pixel aspect ratio (PAR 像素比例)。
而一個顯示本身嘅輸出比例，就係 Display Aspect Ratio (DAR 顯示比例)。
我地而家嘅螢幕，由於係 Square pixel （PAR 1:1），所以一個 640x480、800x600、1024x768嘅畫面，個 DAR 一定會係 4:3；一個 1280x1024 嘅畫面，DAR 一定係 5:4。
要令到 DAR 拉長而 PIXEL 數量不變，就必須將 PAR 拉長：
而家所謂 720x576 比 16:9 其實即係呢個原理－－16:9 中每個 PIXEL 長度將會係 4:3 時代嘅 1.33333.. 倍。
留意一點，720x576 4:3 呢個本身已經唔係 PAR 1:1，因為如果 PAR 係 1:1，720x576 應該係 5:4 先啱。
呢個事實，會說明兩件事:
- 一個非 PAR 1:1 嘅畫面喺一個 PAR 1:1 嘅螢幕上顯示，會出現變形；
- 由於同一個 720x576，16:9 需要比 4:3 儲存更多資料，即係話，佢係犧性細節，換取可視範圍
當我地電視機係 4:3，螢幕係 4:3，DAR 一樣，但 PAR 唔同，可以想像到，其實一個 720x576 4:3 畫面喺螢幕上睇，其實已經有輕微變形，嚴唔嚴重、察唔察覺到又係另一回事。
但當一個 720x576 16:9 畫面出現喺螢幕上面，變形肯定會更嚴重。
而家無記數碼版翡翠台已有用 16:9 輸出，仍然未支援 16:9 嘅原畫面就會用 Pillar Box 填滿，正好可以用嚟比較：
類 比同數碼畫面同樣係 720x576。我哋螢幕嘅 PAR 係 1:1，所以見到兩個畫面都係呈 5:4，同佢地本身嘅 DAR，即 4:3 同 16:9 唔同。所以前者輕微變形，後者明顯睇落窄咗。所以要喺電腦中正確顯示，就要將畫面拉至喺螢幕度睇合比例嘅解像度（其實喺螢幕度睇應該係 720x540 或 768x576 先啱比例，但呢度重點係個闊度，所以唔理個高度住）：
呢種修正，一般播放器都會支援，所以唔係乜嘢難題。
嚟到呢度另一個問題就係，咁講法，咪即係而家數碼廣播，畫面咪可能仲衰過原本個類比制式？當然，720x576 4:3 一定會比 16:9 更多 Detail，但問題係，既然 16:9 闊螢幕係大勢所趨，要做嘅，應該係比較一下 16:9 數碼同 4:3 類比，係咪真係差咗。
電視台嘅高清節目係 720p, 1080i 定 1080p？
720p 或 1080i，冇 1080p。
數碼廣播同高清、16:9有乜關係？
數碼廣播CONCEPT
伴隨住數碼廣播嘅，係一大堆專有名詞：高清、標清、16:9、4:3，呢類名詞雖然的確係因為數碼廣播出現而冒起，但數碼廣播唔等於 16:9 廣播，數碼廣播唔等於高清廣播。前者可能啱，因為市面其實 16:9 電視越嚟越多，所以電視台喺轉數碼時，亦會順勢慢慢過渡到 16:9 年代；後者有留意開新聞就知，其實無記同亞記都各自只有一個台係播高清，亞視仲要一日播兩粒鐘。
類比 vs 數碼
類比 (Analog，政府鍾意用「模擬」，但唔好同 Simulation 個模擬混淆)，同數碼 (Digital) 差別就係資料嘅存貯方式。
比較生活化嘅例子，卡式錄音帶係 Analog，CD、MP3 係 Digital；VHS 錄影帶係 Analog，DVD 係 Digital；菲林機係 Analog，數碼相機係 Digital；雖然我地現實生活，其實就係一堆類比訊號，亦雖然「數碼」係一種將類比訊號模擬出嚟嘅技術（所以 VCD 未必好過錄影帶、你部電話個二三十萬像素相機鏡頭影出嚟效果亦唔會好過菲林），但數碼技術發展，可以畀用家有越嚟越高像真度，而數碼儲存技術優勢係，你播帶、播VHS，佢地嘅內容會隨住使用次數而失真。
電 視訊號經過無線電波傳送，會因為訊號反射及其他干擾而失真，即係你收到嘅訊號，同電視台射出嚟個訊號，可能已有分別。數碼技術都會受反射同干擾影響，但因 為數碼儲存方式，可以加入一啲糾錯 (Error correction) 技術，令收返嚟嘅訊號可以重現返最原本嘅狀態。就同你無線上網相似，你唔會希望人地 SEND 畀你嘅資料，透過無線訊號去到你部電腦，會變晒樣。
但亦都講明，數碼訊號相對類比訊號有較高錯誤修正能力，都唔代表佢係萬能，所以如果訊號差到冇辦法透過運算去修正，咁就等如收唔到，訊號時好時壞，如果係你上網，就會感覺到速度嚴重緩慢甚至冇反應；喺電視上嚟講，就係會出現定格、窒格、爆格、黑畫面。
高清 vs 標清
而家數碼產品通街都係，對於數碼世界組成圖像嘅基本原素－－像素，應該唔使多作解釋。
標 清 (Standard Definition, SD) 同高清 (High Definition, HD) 其實只係一個相對性描述。而家 DVD 影片、類比訊號電視畫面嘅質素，就相當於一個解像度係 720x576 嘅畫面。於是有班人就將呢個解像度，稱為 SD，即「標清」。基於歷史原因，我地又會以高度嚟表示電視畫面解像度，例如 720x576，會叫 576i 或 576p，i 係指 隔行掃描，p 係指 逐行掃描。
以佢嚟做標準，高過呢個標準，就叫做「高清」。如維基所講，「單位面積內的像素越多代表解析度越高」，所謂「高清」，就係指解像度比「標清」高嘅畫面。至於有幾高？「高清」就解像度可分為兩種，一種係 720p，一種係 1080i/p。
香 港高清數碼廣播會根據情況以 720p （1280×720）或 1080i（1920x1080）播放。基於運作原理，隔行掃描比逐行掃描需要較少傳送頻寬，去傳送更高解像度嘅畫面，不過逐行掃描喺顯示高速移動影像時 會更結實，所以電視台方面講過對於畫面移動量較大嘅節目，如播波，就會以 720p 廣播。至於 1080p 雖然係現時最正嘅格式，但可見將來都係睇碟先會見到。
16:9 vs 4:3
傳統 CRT，即而家俾人叫做「大牛龜」嘅電視機，畫面長同高一般係 4:3 比例。電腦常見嘅 800x600、1024x768 呢類解像度就係繼承咗呢種意志。事實上呢個比例源遠流長，喺電視面世時已經使用。
而 16:9 ，有人話用係因為呢種比例較符合人肉眼睇嘢時嘅比例，所以用呢個比例去睇戲，會有更佳享受，仲有人話闊銀幕先係「黃金比例」。唔接受嘅，可以當佢係 MARKETING 招式，侷你換電視。不過喺電視以外嘅領域，尤其電影，仲有好多唔同嘅比例，以呈現攝影者想要嘅效果。
廣播 vs 電視機
以上講到高清 VS 標清、16:9 VS 4:3，其實可以分別應用喺廣播，同你屋企部電視上。換言之，兩者係冇必然關係。即係，大家絕對有機會碰到例如「高清電視播放標清訊號」、「16:9 電視播放 4:3 畫面」嘅情況。
如 果廣播訊號同電視機畫面比例不符，就需要對廣播畫面作出調整，先可以播出嚟。以前 4:3 年代，電視台一定會用 4:3 比例出街，而遇到非 4:3 比例嘅影片，就要校到佢符合 4:3 輸出，例如電影常見嘅上下黑邊，就係電視台將闊銀幕片源轉成 4:3 嘅結果。而家電視台可能會輸出 4:3 或 16:9 訊號，你部電視又可能會係 4:3 或 16:9，一旦唔夾，調整嘅責任就落喺機頂盒/電視機本身。絕大部份機頂盒為例都會提供以下處理方式：
以上三種方法，係從比例、可視空間同細節之間作出取捨。
有啲電視會有一啲較特別嘅模式，例如 Panorama Mode，中央比例不變，兩側就拉大到 FIT 到闊熒幕。
HD Ready vs Full HD
喺 Plasma 或 LCD 電視機領域，市場上見到會分為「HD Ready」及「Full HD（全高清）」兩種產品。
HD Ready 電視會有以下標籤：
而 FULL HD 則可能會有以下標籤：
呢兩個標籤代表電視機嘅不同級別，但其實標籤本身意義亦都唔相同。
首先講下，喺市場上，呢兩種標籤有乜嘢分別。
所 謂 Full HD，就係指呢部電視機塊 PANEL，係由 1920 x 1080 咁多點所組成，所以喺輸入 1920 x 1080 嘅影像時，可以以一個「點對點」嘅方式顯示出嚟畀你睇。點對點嘅好處係，輸入影像唔需要經放大縮細，即係唔會失真，以最接近原裝輸入影像質素，呈現眼前。
而 HD Ready，其實就係話，呢部嘢佢能夠接受同處理到 HD 訊號，但面板就細過 1920 x 1080，例如會有 1024 x 768，或者 1366 x 768 大細。即係話如果個訊源係一個 1920x1080 嘅畫面，呢部電視係可以收得到同埋顯示得到，但喺內部要先將畫面縮細，塞入一個較細嘅解像度。
注 意一點，大家知道 720p、1080i同1080p 都係 HD 訊號，所以 HD Ready/Full HD 嘅「接受到」HD Signal，有啲可能係 720p/1080i 而唔包括 1080p，即係話 Full HD 只係講緊個面板大細，但亦可以係 1080p Full HD 或 1080i Full HD，睇嗰陣要留意。
以 1366 x 768 顯示 1920 x 1080 畫面，大槪就係縮細 30%。雖然的確係冇咗，但亦唔好迷信，細咗一定差咗。畢竟畫面質素唔單止係講個 Panel 有幾多粒 Pixel，製造商研發能力同埋製造品質等等都係因素，即係例如如果啲色出得唔靚，又或者唔喺正中央睇就會走晒色，咁 1920 x 1080 都係枉然。
有人話 50 吋以上，HD Ready 同 Full HD 嘅分別先會明顯，因為細尺寸密度已經夠高，好難睇到個分別，尤其是大家睇電視其實唔會貼住部機逐粒 Pixel 慢慢數。不過錢在你手，揀邊隻最好親眼比較過先去決定。
所 謂 HD Ready 同埋 Full HD 字眼係喺 Plasma/LCD 薄屏電視興起先出現，而一般舊式 CRT 電視，由於本身已經唔可以用 1080i/p 或 720p 高清訊號輸入，所以個片源一定先降到去部電視接受到嘅 Format（PAL 嚟計就係 576i）。呢種「降級」功能，機頂盒一般會提供。所以，睇，都係睇到，只係效果冇 HD Ready/Full HD 咁好。
所以有兩樣嘢好重要，就係：
- 唔係部電視寫住支援高清，就一定睇到最靚嘅高清畫面；
- 亦唔係話電視唔支援高清，就一定睇唔到高清節目，因為可以加樣叫機頂盒嘅物體。
而 Full HD 同 HD Ready，係一個好好嘅參考指標，所謂 HD Ready 唔夠 Full HD 好，就面板解像度數字上嚟講，係，但絕對唔代表一切。
呢啲就係 Full HD vs HD Ready 嘅市場意義。但留意以上講緊，全部都係有關塊 Panel 有幾多點。但其實所謂「HD Ready」，係包含更多意義。
講返 HD Ready 呢個標誌，其實係需要先經認證。要得到認證，嗰個產品就必須符合一系列要求，並且科水。符合加上 HD Ready 標誌嘅要求包括：
所 以單就面板大細而言，1920x1080 既然符合第一點「最少720線」，即係話只要符合其餘三點，一樣可以申請掛上 "HD Ready" 標籤，甚至佢 support 埋 1080p 輸入一樣得，只係你 1024x768 又係 HD Ready，我 1920x1080 又係 HD Ready 嘅話，似乎又突顯唔到個身價，於是就有所謂「Full HD 1080」呢類 Logo：
有趣地，掛上面個 LOGO 時，大部份產品反而唔見 HD ready 標誌，即係喺市面上，HD Ready 同 Full HD 變成一種壁壘分明、層次唔同嘅局面。但必須留意一點，事實上呢個「Full HD 1080」Logo，同埋佢個聲稱，唔同 "HD Ready"，係唔需要先經某組織審核承認至掛得嘅，佢亦都唔受以上 HD Ready 中對於輸入端子、接受視訊格式等等要求所規限，呢個 Logo 設計亦唔係乜嘢官方標準。即係，HD Ready 係一個認證標籤，但 Full HD 只係一個宣稱，甚至個設計亦可能隨生產商喜好而有唔同設計，例如日立有「Full HD 1080p」標誌。
一 般情況下、習慣上，"Full HD" 嘅宣稱，係表示佢支援埋 1920x1080 面板，同埋 1080P 輸入，但既然佢唔係乜嘢認可標準，即係對於 Full HD 呢個字眼，不同廠商可以有唔同嘅解讀。呢個就係點解 Full HD 唔一定代表接受到 1080p 訊號嘅原因。
由於呢個原因，認證 HD Ready 嘅機構歐洲資訊及通訊科技業協會 (EICTA) 喺 2007 年 更新咗對於 HD Ready 認證嘅要求。新嘅制度下，原本 HD Ready 標籤以外，會另加以下呢款標籤：
呢個標籤嘅意義，包括：
- 最少 1920x1080 像素面板
- 不變形重現所有支援嘅影像格式
以 1920x1080 (1080i/1080p) 輸入嘅影像顯示時唔可以有 overscan
- 可以用相同或更高嘅格數、1920x1080解像度重現所支援嘅 1080p 影像格式
接受色差線同埋 HDMI/DVI輸入
色差線能夠接受 1280x720 @ 50 & 60Hz 逐行掃瞄 (720p) 同埋 1920x1080 @ 50 & 60Hz (1080i) 隔行掃瞄高解像視訊格式輸入
DVI/HDMI 介面可接受 1280x720 @ 50 & 60Hz 逐行掃瞄 (720p)、1920x1080 @ 50 & 60Hz 隔行掃瞄 (1080i) 同埋 1920x1080 @ 24、50、60Hz 逐行掃瞄 (1080p) 視訊格式輸入
DVI/HDMI 介面需支援 HDCP
即係話，HD Ready 1080p 級數係 HD Ready 之上，而且有呢個標籤就肯定支援 1080p 嘅輸入格式，而且確保輸出唔會變形、冇 overscan 情況。
所 以電視台叫人認住 Full HD，即係叫人認一個宣稱而唔係認證，感覺上唔係好妥，但現實上，香港市面又好似真係唔多見 HD Ready 1080p 嘅標籤。但無論點，HD Ready 1080p 嘅要求係一個好重要嘅參考，即係貼住 Full HD，作為精明消費者，買時都要留意佢係咪做到 HD Ready 1080p 嘅要求，例如 overscan 問題（但亦要小心，因為唔少電器舖係靠分線器將訊號輸出去 N 部電視，如果部分線器用色差而唔係 HDMI，即使部電視機本身 Support 亦未必能以最高標準，即係例如不變形、唔變 FRAME RATE、冇 overscan 輸出影像）。
但當然，冇 HD Ready 認證嘅牌子，唔代表佢一定差，可能佢規格上符合資格，只係唔想畀錢咁解。
我的電視只係一般 CRT 大牛龜電視，係咪冇得睇數碼廣播？
我的電視已經係16:9/FULL HD/50吋 LCD TV/Plasma/其他勁型號，係咪可以唔使加乜盒物盒就睇到數碼廣播？
呢個係一聽到數碼廣播，有興趣嘅人最關心嘅問題。呢個問題可以分為幾部份，又或者要睇到廣碼廣播，就要符合以下條件：
1. 你屋企，係咪處於數碼廣播接收範圍？
數碼廣播，唔單止電視台要搞 嘢，發射站亦要搞嘢。現時只有慈雲山搞掂並運作中，即係話而家所有數碼廣播訊號都係佢射出嚟嘅。慈雲山發射站覆蓋九龍半島、港島北部、大嶼山東部及沙田局 部地區（藍田、觀塘、牛頭角、九龍城、九龍灣、土瓜灣、紅磡、何文田、彩虹、鑽石山、黃大仙、樂富、九龍塘、美孚、荔枝角、長沙灣、深水埗、西環、上環、 中環、灣仔、銅鑼灣、鰂魚涌、筲箕灣、柴灣）；如果你唔係呢啲區，可以等下，又或者做白老鼠試下會唔會好彩射中你屋企。
想知道發射站嘅大概覆蓋範圍，可以 按此下載 Google Earth KMZ 檔案，直接喺 Google Earth 睇下你屬於邊個發射站嘅覆蓋範圍（善用佢個隱藏 LAYER 功能）。 你亦都可以喺 Google Maps 睇下個覆蓋範圍。
另外，你都可以喺電訊管理局嘅 數碼地面電視服務覆蓋資料庫 搵下你屋企個地址有無覆蓋。
2. 天線
一般獨立天線可直收，乜都 唔使搞。但大廈公共天線就要睇情況，事關啲公共天線接收後會經放大器或轉換器再轉送訊號到各家各戶，問題就係呢啲器材（特別係頻率分配器，多謝有線電視 啦）未必 SUPPORT 數碼電視 SIGNAL（總增益輸出唔夠支持咁多頻道），但其實都話唔埋。所以係可能要更新，而唔係一定要。公共屋邨房署會搞掂，而家已經做緊；私人屋苑則可以搵管理公司或業主立案法團請人檢查。
4. 接收
呢個條件，亦係「我部 LCD/PLASMA/CRT 電視，睇唔睇到數碼廣播」嘅答案。
而家大家睇四個免費台嗰陣，其實你部電視就係兼任接收同輸出功能。一般香港買到嘅電視，已經內置 NTSC、PAL 及 SECAM 三種類比制式調諧器 (Tuner)。香港用緊 PAL 制式，所以我哋睇電視，唔使加任何儀器就可以睇到。
但如果你有裝有線或者 NOW，都知道睇收費電視要加個盒先睇到。咁嘅情況下，呢個盒就會負責接收，而你部電視就淨係負責輸出。又或者正如你駁 PS3 駁 Wii 去部電視，部電視都係淨係負責輸出，唔會同你 LOAD GAME 玩。
一般人問「我部電視睇唔睇到數碼廣播」，其實多數就係問：「到底可以乜都唔使做就睇到，定還是要加舊嘢先睇到」（當然，可能有機會加舊嘢都睇唔到，但機會好微）。
而家情況係：
香港用嘅數碼廣播制式，係國家研發，泛稱 DMB-T/H（又叫 DTMB）嘅廣播制式。而市場上仲有 ATSC（美國制式）、DVB-T（歐制）及ISDB-T（日本制），連同 DMB-T/H 四分天下。
- 呢個 DTMB 制式，2007 年 8 月終定！
- 香港係最先採用呢個制式嘅地區
- 呢個制式同其他數碼廣播制式互不兼容
咁大家就可以想像到，如果你半年前買咗部電視，佢「識得認」呢隻咁新嘅標準嘅機會有幾大。
冇啱用嘅接收元件，電視機就唔會識得點對應。所以，即使你部機咁叻，Support 晒 DVB-T、ATSC、ISDB-T 三種數碼電視接收制式，一樣睇唔到，因為唔 Support DTMB。如有疑問，不妨揭開本說明書睇睇。
睇唔到，咁點算好？
睇法1. 等內置 DMB-T/H 解碼器嘅電視機
就算而家未出，將來都會出，可以等到佢出。支援香港選用嘅數碼廣播制式嘅電視機，電訊管理局稱之為「綜合數碼電視機」，市場又稱之為「整合式電視機」，又或者「2合1電視機」、「一體機」，唔理佢點叫，總之就好似而家你睇無記亞記咁，唔使加嘢就睇到！
優點：
- 方便
- 整合性強，多舊盒即多個兼容問題機會，內置就唔使擔心
- 大牌子電視啲影像處理技術，喺升頻等處理方面可能好過機頂盒
缺點： 換句話，即係要買過部新電視，唔係個個都想
睇法2. 加機頂盒
如果唔想換電視，或者想早買早享受，又如何？可以好似裝 NOW 裝 CABLE 咁加個盒。 你都係要俾錢，不過唔係畀電視台，而係畀個機頂盒製造商。
數碼電視機頂盒，或稱「接收器」，又可稱為「解碼器」，主要作用係：
- 接收發射站嘅數碼廣播訊號
- 對訊號進行解碼，轉為圖像，並輸出至電視機
換言之，你用呢個接收器，通過 HDMI、色差、三色線等端子駁去電視機，就係取代電視機嘅接收部份，將 TUNE 台、轉台、揀聲道、字幕等等所有有關數碼廣播接收嘅相關功能，交去畀個盒仔做，電視機就淨係出畫面。
訊號來源係 4:3 又好， 16:9 也好，標清高清都好，都係由個盒負責，轉換為你部電視出得到嘅訊號。
機頂盒好處:
- 相對慳錢，買個盒點都平過買部新機
- 環保，你部機可能性能良好，扔咗佢太大嘥
- 早買早享受，而家已有若干型號有現貨
機頂盒缺點:
- 實唔夠內置式電視機方便
- 機頂盒嘅接收解碼以至視訊處理能力未必夠新出電視勁
無論係想買機頂盒定內置電視機，都要留意接收器注意事項。
要買機頂盒或者內置電視，根據電訊管理局政策，呢類產品都可劃分為「基本版」同「升級版」兩種。顧名思義，「升級版」會勁過「基本版」。電訊管理局又整咗個標籤計劃，只要通過測試，就可以貼上下面兩張 LABEL：
標籤計劃屬自願性質，有標籤就一定符合佢聲稱版本嘅接收標準，但冇，亦未必唔得。
電訊管理局會定期更新符合認證嘅產品名單：
呢個標籤可能唔想宣傳電視台，所以語焉不詳。其實直接啲講，「基本版」同「升級版」功能分別如下（順便同而家大家電視機用嘅類比接收作對比）:
頻道 | 類比制式 | 基本版 | 升級版 |
無綫現有頻道 |
|
翡翠台 | ○ | ○ | ○ |
明珠台 | ○ | ○ | ○ |
無綫新增頻道 |
|
互動新聞台 | ╳ | ╳ | ○ |
翡翠2台 | ╳ | ╳ | ○ |
高清翡翠台 | ╳ | ╳ | ○ |
亞視現有頻道 |
|
本港台 | ○ | ○ | ○ |
國際台 | ○ | ○ | ○ |
亞視新增頻道 |
|
新聞財經頻道 | ╳ | ╳ | ○ |
動感資訊頻道 | ╳ | ╳ | ○ |
魅力資訊頻道 | ╳ | ╳ | ○ |
文化資訊頻道 | ╳ | ╳ | ○ |
高清頻道 | ╳ | ╳ | ○ |
有啲人話基本版淨係睇到標清台，睇唔到高清台，其實係錯嘅，根本唔關事，唔好見到「基本版」就以為係「標清版」。「基本版」同「升級版」嘅最大分別其實係，後者有 H264 解碼功能，而所有上述新增頻道，都係以 H264 方式做 ENCODING。
另外 TVB 宣佈會用 MHEG-5 數碼廣播互動功能標準，支援呢個標準嘅接收器，未來可使用 TVB 的互動功能。
睇法3. 其他
例如主攻電腦市場嘅產品，好似有 Avermedia 出嘅 USB 手指、Lifeview 會有電視卡之類。
4. 效果
睇到數碼廣播，唔代表一定靚。靚唔靚，好大程度就真係取決你部電視。到底係舊式 CRT 定新式 PLASMA/LCD；就算係新式，究竟係 FULL HD 定係 HD READY？呢幾樣都會係重要因素。關於呢點，請參考數碼廣播 CONCEPT
